المحيبس

شلونكم حبايب جدو .. ان شاء الله بخير
سامعين بهاي الكلمات

هالعضمين بهالعضمين والباقي كلها اتصفك
من احلى لعبات رمضان كانت المحيبس والي بيها يختلون المحبس بايد واحد من فريق يتكون من عشرات الاشخاص ويجي شخص من الفريق الثاني لازم يعرف المحبس وين .. اللعبة اصلها بغدادي وكانت تصير بين فرق منطقتين من بغداد او حتى محافظتين وكان اعضاء الفريق يوصل الى 200 شخص او اكثر ودائما مع كل فريق كان يجي واحد هذا شغلته يطلع المحبس من الفريق الثاني.. ومن اشهر لاعبي المحيبس بالعراق هو (جاسم الاسود) من منطقة الكاظمية ببغداد والي كان يطلع المحبس من ايد 200 شخص، طبعا مرات يصيرون اعصاب وتصير خلافات بين الفريقين لكن تبقى هي خلافات حبايب وكلوب طيبة ما اطول اكثر من دقيقتين.
واجمل الطقوس المرافقة لهاي اللعبة هو فرقة المربعات البغدادية الي تغني المربعات والبستات البغدادية التشجيعية للاعبي المحيبس حتى يفوزون، وطبعا هذا المشهد كله يزداد حلاوة لمن تنزل صواني الزلابية والبقلاوة والي تتوزع على كل الحاضرين والي واكف يم الصينية يصيح (حلي حلكك يا ولد).
ومن واحد يطلع المحبس من الفريق الثاني تبدي الهتافات والرقصات والاغاني الشعبية
طبعا كانت اللعبات تمتد الى ساعات الفجر من اليوم الثاني ومرات تبقى للظهر وبعد نهاية اللعبة كل الحاضرين ينسون العصبية والتوتر الي صار بينهم وواحد يسلم على الثاني وواحد يبوس الثاني ويعيشون عيشة سعيدة.

في أمان الله حبايب جدي ونتلاكه بقصة جديدة