شلونكم جدو .. ان شاء الله الكل بخير .. اليوم جدو حسام راح يحجيلكم على وحدة من اقدم عادات شهر رمضان الكريم ونسميها (ماعون رايح ماعون جاي).. البيوت والعوائل بكل الاحياء العراقية كانوا يعيشون وكانهم بيت واحد وعائلة وحدة .. وكان لما بيت منهم يطبخ اكلة طيبة يتمنى الكل ياكل منها ويشاركهم بيها.. ولما يجي شهر رمضان يكون لهذه العادة خصوصية، فمع اول ايام رمضان وتحديدا قبل الفطور بساعة او اقل تبدي المواعين تتنقل بين الجوارين ونشوف الاطفال كل واحد منهم واكف يم بيت ويحمل بيده ماعون بيه اما شوربة او برياني او دولمة او قطايف او عوامات او اي اكلة من الاكلات الي يشتهر بيها المطبخ العراقي..
اما البيوت الي كان يفصل بينها سياج بس كانت امهات البيوت يتبادلون المواعين من هذا السياج وتسمع عبارات كانت مثل نغمات الموسيقى (عيوني ام علاوي هذا ماعون دولمة تنغصته الكم للفطور) او (تعال ماما حمودي هذه عوامات تحلون بيها ورة الفطور).. (ام سعودي حبيبتي هذا ماعون حلاوة حليب لايك لها الحلك) .. ومرات كثيرة كان كل ماعون ياخذ جولة بين البيوت حتى ينسون منو صاحبه او من يا بيت طلع .. وهذا الحال يبقى من اول يوم رمضان وحتى ليلة العيد..
والاطيب من كل هذه الاكلات هي المحبة والكلمة الحلوة الي تجمع الناس والي تخليهم عائلة وحدة..
احجولي انتو منو منكم ياخذ ماعون لجيرانهم وشنو اطيب اكله تودها الهم