القصخون

كان يا مكان في قديم الزمان .. هذه هي الجملة التي يبدأ بيها الكلام بطل حلقتنا لهذا اليوم
شلونكم جدو ان شاء الله بخير يا حلوين
اليوم راح نحجي عن شخصية كانت من اهم واطرف الشخصيات في شهر رمضان والي يسموه (القصخون) ومعناها راوي الحكايات المحترف..
كانت الناس بعد ما تخلص فطور يتوجهون الى الكهوة والكل كان يتسابق حتى يحصل مكان قريب من مكان القصخون، طبعا الاجواء جميلة جدا والناس ملتمين يشربون جاي وحامض (نومي بصرة ) ودارسين وصوت الضحك مالي الكهوة الى ان يحضر القصخون الي كان دائما يكون رجل كبير السن وقور ولابس الصاية البغدادية وعلى راسة (الجراوية) واله هيبة خاصة واول مايدخل يكول السلام عليكم ويكعد بمكان بوسط الكهوة.
وبس يكول كان يا مكان في قديم الزمان، حتى يعم الهدوء في الكهوة بحيث اذا تذب الابرة تسمع صوتها ، القصص الي كان يرورها القصخون غالبا ماتكون من التراث القديم وقصص الابطال والفرسان والمغامرات و الحكم والامثال الشعبية الي كانت مسلية جدا وبنفس الوقت يتعلم منها الصغير والجبير.
طبعا كان القصخون هو المتعة الرئيسية للناس ايام زمان خصوصا قبل ان يظهر التلفزيون والراديو ، طبعا كانت طريقة القائه للقصة مشوقة جدا ويغير بصوته حسب الاحداث وكانت الناس تستمتع بالقصة حتى لو سامعيها سابقا.

والقصخون موجود في بلادنا العربية الاخرى واليه يسموه (الحكواتي).
انتظروني بقصة جديدة حبايب جدو وفي امان الله

لوحة القصخون للفنان حسين علوان